Thursday, June 2, 2016

சிகரெட்டில் வெற்று பேக் முறையைக் கொண்டு வாருங்கள் பினாங்கு பயனீட்டாளர் சங்கம் வேண்டுகோள்

பத்திரிகைச் செய்தி                                                                                                                           30.5.2016
ஜூன் 2009லிருந்து மலேசியா சிகரெட்டு பேக்கட்டுக்களில் படத்தோடு கூடிய எச்சரிக்கை வாசகங்களைப் பொறித்து வெளியிட்டது. அதிலிருந்து சுமார் 92.8 விழுக்காட்டினர் (93.2 விழுக்காடு ஆண்கள், 74.7 விழுக்காடு பெண்கள்) இந்த எச்சரிக்கை வாசகங்களை உற்று கவனித்துள்ளதாக மலேசிய அனைத்துலக புகையிலை ஆய்வகம் (GATS) அறிவித்துள்ளது. அபாய படத்தோடு கூடிய எச்சரிக்கை வாசகங்கள் பலன் தரக்கூடியவை என்பதையே இது காட்டுகிறது. வேறு பல நாடுகளுள் இந்த முறையை அமலாக்கம் செய்துள்ளன. உலக சுகாதார நிறுவனத்தின் புகையிலை கட்டுப்பாடு பேரவையின் கட்டுரை 11க்கு இணங்க இது அமலாக்கம் செய்யப்பட்டுள்ளது. மலேசியா இந்தப் பேரவையின் ஓர் அங்கமாகும். 23.9.2003ல் இதற்கான ஒப்பந்தத்தில் மலேசியா கையெழுத்திட்டுள்ளது. மலேசியா புகையிலை கட்டுப்பாட்டு நடவடிக்கைகளை மேற்கொள்ளுவதற்கு இந்தப் புகையிலைக் கட்டுப்பாட்டு பேரவை ஒரு வழிகாட்டியாகும் என்று பினாங்கு பயனீட்டாளர் சங்கத் தலைவர் எஸ்.எம்.முகம்மது இத்ரிஸ் கூறினார்.
தற்பொழுது மலேசியாவில் சிகரெட் பேக்கட்டின் முன் பக்க அட்டையில் 50 விழுக்காடும் பின் பக்க அட்டையில் 60 விழுக்காடும் படத்தோடு கூடிய எச்சரிக்கை வாசகங்களால் நிரப்பப்பட்டுள்ளது. ஆனால் எஞ்சியுள்ள இடத்தை மிகவும் அழகான எழுத்துக்களைக் கொண்டு நிரப்புவதில் புகையிலைக் கம்பெனிகள் அதிக அக்கறை காட்டி வருகின்றன. இது இந்த எச்சரிக்கை வாசகங்கள் புகைப்போரை பாதிக்காமல் இருக்க அவர்கள் எடுத்து வரும் முயற்சிகளாகும் என்றார் இத்ரிஸ்.

சாதாரண பேக்கட் முறையை முதலில் அமலுக்குக் கொண்டு வந்த நாடு ஆஸ்திரேலியா ஆகும். ஆஸ்திரேலியா இதனை டிசம்பர் 2012ல் அமலுக்குக் கொண்டு வந்தது. இதற்கு என்ன அர்த்தமென்றால் சிகரெட் உற்பத்தியாளர்கள் பிரண்டு பெயர் மற்றும் அதன் மணத்தை குறிப்பிட்ட அளவில், எழுத்து மற்றும் இடத்தில் மட்டுமே பொறிக்க முடியும். இதனோடு சேர்த்து சிகரெட்டில் உள்ள நச்சுக்களின் அளவையும் வரி செலுத்திய முத்திரையையும் பதிக்க வேண்டும். எல்லா சிகரெட் பேக்கட்டுக்களும் அதன் வர்ணத்தையும் சேர்த்து ஒரே மாதிரியான தோற்றத்தில் இருக்க வேண்டும்.
ஆஸ்திரேலியா வெற்று பேக்கட் முறையை கொண்டு வந்த பிறகு 2010லிருந்து 2013 வரைக்கும் 14 வயதுக்கு மேற்பட்டவர்களிடையே புகைப்பவர்களின் எண்ணிக்கை 15.1 விழுக்காட்டிலிருந்து 12.8 விழுக்காட்டுக்குக் குறைந்துள்ளது.

இதனோடு சேர்த்து புகையிலைக்கு விதிக்கப்பட்ட 25% வரி அதிகரிப்பும் ஆஸ்திரேலியாவில் புகைப்பவர்களின் எண்ணிக்கையைக் குறைத்துள்ளது என்றார் இத்ரிஸ்.

இந்த ஆண்டின் புகையிலை கருப்பொருள் “வெற்று பேக்கட் முறைக்கு தயாராகுங்கள்” என்பதாகும். இதற்கு ஒப்ப இங்கிலாந்து, அயர்லாந்து, பிரான்ஸ் ஆகிய நாடுகள் சிகரெட்டில் வெற்று பேக்கட் முறையை அறிமுகப்படுத்தியுள்ளன. மலேசியா, தாய்லாந்து மற்றும் சிங்கப்பூர் வெற்று பேக்கட்டை அறிமுகப்படுத்துவற்கான முயற்சிகளில் இறங்கியுள்ளன. அவர்கள் இதனை வெற்றிகரமாக செயல்படுத்துவார்களேயானால், புகையிலை கட்டுப்பாட்டு பேரவையின் நடவடிக்கைகளுக்கு இது புது உத்வேகத்தை அளிக்கும் என்றார் இத்ரிஸ்.

தங்கள் சிகரெட்டுக்களை கவர்ச்சிகரமாகக் காட்டும் பொருட்டும், இன்னும் நிறைய மக்களை புகையிலைக்கு அடிமையாக்கும் பொருட்டும் புகையிலைக் கம்பெனிகள் சிகரெட்டு பேக்கட்டுகளில் படங்களைப் பொறித்து வருகின்றன. புகை பிடிப்பவர்களின் இருவரில் ஒருவர் புகையிலை சம்பந்தப்பட்ட நோய்களால் இறந்துபோகிறார். புகைப்பது உடலில் உள்ள அநேகமாக எல்லா உறுப்புக்களையுமே சேதத்திற்கு உள்ளாக்குகிறது. நிறைய நோய்களை உண்டாக்குகிறது. புகைப்பவரின் ஒட்டு மொத்த ஆரோக்கியத்தையே உருக்குலைக்கிறது என்றார் இத்ரிஸ்.
புகைப்பது சம்பந்தப்பட்ட நோய்கள் ஒவ்வொரு வருடமும் 10,000 பேரைக் (4ல் ஒருவர்) கொல்கின்றன. ஒவ்வொரு பேருந்திலும் 40 பேர் என மொத்தம் 250 பேருந்துக்கள் விபத்துக்குள்ளாகி அனைவரும் இறந்துபோவது போன்று இதனை எடுத்துக்கொள்ளலாம்.

ஒருவர் ஒரு நாளைக்கு மவெ. 17 விலையுள்ள ஒரு பேக்கட் சிகரெட்டை புகைத்து முடிப்பாரானால் 30 நாளைக்கு அவர் மவெ. 510 செலவு செய்ய வேண்டியுள்ளது. ஒருவருடைய மாத வருமானம் மவெ. 1500 ஆக இருக்கும் பட்சத்தில் புகைப்பதற்காக அவர் தன்னுடைய வருமானத்தில் 34 விழுக்காட்டினை செலவு செய்கிறார் என்று அர்த்தம். இது அவர் குடும்பத்திற்காக செய்ய வேண்டிய இதர செலவினங்களையும் பாதிக்கும். குடும்பத்திற்கு தேவையான உணவு மற்றும் பல்வேறான அடிப்படைத் தேவைகளை இந்தத் துர்ப்பழக்கத்தின் காரணமாக அவர் பூர்த்தி செய்ய முடியாமல் போய்விடும் என்றார் இத்ரிஸ்.
இப்படிப் பணத்தை விரயமாக்கும் ஒரு பழக்கத்தால் வேறு பல மோசமான பாதிப்புக்களும் ஏற்படுகின்றன. புகைப்பதால் ஏற்படும் மிகவும் முக்கியமான 3 நோய்களை குணப்படுத்துவதற்கு 2005ல் மட்டும் அரசாங்கம் மவெ. 2.92 பில்லியனை செலவழித்துள்ளது. புகைப்பது தொடர்பான நோய்கள் ஏற்படும்பொழுது ஒரு தொழிலாளியின் ஆக்கப்பூர்வமான பணிகள் முடக்கப்பட்டு விடுகின்றன. அவருடைய நோய்க்கு கம்பெனி பணம் செலவழிக்க வேண்டிய சூழ்நிலை உருவாகிறது. குடும்ப வருமானத்தையும் மருத்துவ சிகிச்சைக்காக செலவிட நேருகிறது. புகைப்பது தொடர்பான நோய்களால் இறந்து போனவரின் குடும்ப வருமானமும் பாதிக்கப்படுகிறது என்றார் இத்ரிஸ்.
குடும்பத் தலைவர் புகைக்கும்பொழுது அவர் இழுத்து விடும் புகையை குடும்பத்தில் உள்ள மற்ற உறுப்பினர்களும் தொடர்ச்சியாக இழுக்கும் பட்சத்தில் அவர்களும் புகையிலை சம்பந்தமான நோய்களால் பாதிப்புக்கு உள்ளாகிறார்கள் என்றார் இத்ரிஸ்.
இறந்து போன சிகரெட் புகைப்பாளர்களுக்கு மாற்று தேடும் பொருட்டு புகையிலைக் கம்பெனிகள் இளையோர்களைக் குறி வைத்து நகர்ந்து கொண்டிருக்கின்றன. சிகரெட் பேக்கட்டுக்களை இளைஞர்கள் மற்றும் பெண்கள் மத்தியில் கவர்ச்சியற்றதாக ஆக்க வேண்டும் என்றால் வெற்று பேக்கட் முறையே சிறந்த வழி என்று பினாங்கு பயனீட்டாளர் சங்கத் தலைவர் எஸ்.எம்.முகம்மது இத்ரிஸ் கூறினார்.
எஸ்.எம்.முகம்மது இத்ரிஸ்
தலைவர்
பினாங்கு பயனீட்டாளர் சங்கம்

Wednesday, December 11, 2013

சாலு மரத திம்மக்கா



















"சாலு மரத திம்மக்கா" என்றால், கர்நாடகாவுக்கே தெரியும்

எண்பது ஆண்டுகளுக்கு முன்பு வரை பொட்டல் காடாக இருந்த கூதூர் கிராமத்தில்... இன்று சாலை நெடுக இருபுறங்களிலும் ஆயிரத்துக்கும் மேற்பட்ட ஆலமரங்கள் சலசலக்கின்றன. தேசிய நெடுஞ்சாலையிலிருந்து கூதூர் வரை நீளும் சுமார் 20 கிலோ மீட்டர் சாலை முழுக்க வரிசையாக (சாலுத) நின்று, ஊருக்கே நிழலாற்றும் அம்மரங்களை நட்டு வளர்த்த திம்மக்கா பாட்டிக்கு இப்போது வயது... 101!

இந்த பசுமைச் சேவைக்காக... சிறந்த தேசியக் குடிமகன் விருது, நான்கு குடியரசுத் தலைவர்களின் கையால் பெற்ற விருதுகள், மூன்று பிரதமர்களிடமிருந்து பெற்ற விருதுகள், பல முதலமைச்சர்கள் அதிசயித்து அளித்த மாநில விருதுகள், தன்னார்வ, பெண் நல நிறுவனங்கள் வழங்கிய விருதுகள், பட்டங்கள் என குவித்திருக்கும் திம்மக்கா பாட்டியின் கூதூர் கிராமம் இருப்பது... செல்போன்சிக்னல் கூட கிடைக்காத பெங்களூரு ஊரக மாவட்டமான மாகடி தாலுகாவில்!

பயணம் நெடுகிலும் திம்மக்கா பாட்டி வளர்த்திருக்கும் ஆலமரங்கள் தலையசைத்து வரவேற்கின்றன. வாசலில் நம்மைக் கண்டவுடன், முந்தானையில் முடிந்திருந்த கசங்கிய 10 ரூபாய் நோட்டைக் கொடுத்து, டீ வாங்கிவர ஆள் அனுப்புகிறார். உடனடியாகக் குளித்து, விபூதி பூசி, பளிச்சென அணிந்து சிரிக்கிறார்... ஐந்து நிமிடங்களுக்குள்!

"ஏழைக் குடும்பத்துல பிறந்தவ நான். 16 வயசுல, என் எசமான் சிக்கையா கையில புடிச்சுக் கொடுத்துட்டாங்க. பேகூர்ல இருந்து கூதூருக்கு வந்துட்டோம். கல்யாணமாகி 10 வருஷம் ஆகியும் குழந்தை எதுவும் உண்டாகல. ஏறாத கோயில் இல்லை. விரதம் இருந்தே உடம்பு வீணாப் போச்சு. அக்கம்பக்கம் ஜாடை மாடையா பேசின பேச்சு, உயிரை வதைச்சுது. காலையில இருந்து சாயங்காலம் வரைக்கும் காட்டுல உழைச்சுட்டு வீடு வந்தா, சோறு இறங்காது... நிம்மதியான தூக்கமும் இருக்காது. ஒரு கட்டத்துல தூக்கு மாட்டிக்கலாம்னு நினைக்கற அளவுக்கு மனசு வெறுத்துட்டேன்.".

- இதைச் சொல்லும்போது, இந்த 101 வயதிலும் கண்கள் இடுங்குகின்றன. "வயித்துல சுமந்து வளர்க்கறது மட்டும்தான் உசுரா...? ஆண்டவன் படைப்புல ஆடு, மாடு, மரம், செடினு எல்லாமே உயிருதான்ங்கிற உண்மையை, அப்போ என் மனசு தவிச்ச தவிப்பு மூலமா உணர்ந்தேன். "குழி பறிச்சு, கன்று நட்டு, தண்ணிவிட்டு... அந்தச் செடியையே புள்ளையா
வளர்ப்போம்.

ஊர்ல எல்லாரோட புள்ளைகளும் அவுங்கவங்க அப்பன், ஆத்தாவைத்தான் பார்த்துக்குவாங்க. ஆனா, என் புள்ளைங்க வளர்ந்து, இந்த ஆத்தாவுக்கு மட்டுமில்ல... ஊருக்கே நிழல் கொடுக்கும்"னு என் மனசுக்கு ஒரு தெளிவு கிடைச்சுது. இந்த கூதூர் முழுக்க பொட்டல் காடுதான். வெக்கையா திகிக்கும். ரோட்டோர சுமைதாங்கிக் கல் பக்கத்துல ஒரு ஆலங்கன்று நட்டு வளர்த்தேன். ஆரம்பத்துல, "இது என்னாடி கிறுக்குத்தனம்?"னு கோபப்பட்டார் என் எசமான். ஆனா... அந்தச் செடி வேர் பிடிச்சு, இலை துளிர்த்து வளர்ந்தப்போ... வயிறு குளிர்ந்து, மனசு குளிர்ந்து நான் அடைஞ்ச சந்தோஷத்தை ரசிச்சவர், அதுக்குப் பிறகு மரம் நடுற வேலைகள்ல எனக்கு உதவிகள் செய்ய ஆரம்பிச்சார்.

காடு, மேடுனு அலைஞ்சி, திரிஞ்சி நிறைய ஆலமரக் கன்றுகளா கொண்டு வந்து, பதியம் போட்டு வளர்த்து, கொஞ்சம் பெருசானதும், ரோட்டோரத்துல குழி தோண்டி நட்டோம். இப்படி ஆலமரக் கன்றுகளா நட்டுட்டே இருந்தோம். மழை வரும்போதே குழிவெட்டி சேமிச்சாதான் தண்ணி. அப்படி சேர்ந்த தண்ணியை கிணத்துல, குளத்துல இருந்து எடுத்துட்டு வந்து நானும் எசமானும் கஷ்டம் பார்க்காம ஊத்தி ஊத்தி வளர்த்தோம்.

ஒரு தடவை குடிக்கக்கூட தண்ணி இல்லாத அளவுக்குப் பஞ்சம். பக்கத்து ஊர்ல இருந்து ஆளுக்கு ரெண்டு மண்பானையில தண்ணி எடுத்துட்டு வந்து செடிகளுக்கு ஊத்தினோம். சுடுவெயில்ல தலையில ஒண்ணு, இடுப்புல ஒண்ணுனு ரெண்டு பானையோட வரும்போது, கல் தடுக்கி விழுந்து, முட்டியில ரத்தம். கீழ கிடந்து அழ ஆரம்பிச்சுட்டேன். "சரியாயிடும்"னு என் எசமான் பதறிக் கட்டுப்போட, "தண்ணியெல்லாம் கொட்டிப் போச்சேனுதான் அழுவறேன்"னு நான் சொல்ல, கண் கலங்கிட்டார்!" - நாமும் கலங்கித்தான் போனோம்.

"அப்படி நாங்க அரும்பாடுபட்டு வளர்த்த ஆயிரம் மரங்கள்தான், இன்னிக்கு உயர வளர்ந்து ஒய்யாரமா நிக்குது. இந்தப் பொட்டல் காட்டுக்கு வர்ற சாலையைச் சோலையாக்கித் தந்திருக்கு. தன் காலடியில கிடக்கிற அத்தனை பேருக்கும் நிழல் தருது. ஊரோட வெம்மையைத் தணிச்சு, குளிர்ந்த காத்தைக் கடத்துது. "மரத்தை வெச்ச மகராசி, நீ நல்ல இருக்கணும்!"னு சனங்க எல்லாம் சொல்லும்போது, நல்ல புள்ளையைப் பெத்த புண்ணியவதி மனசு குளிர்ற மாதிரி, என் மனசும் குளிர்ந்து போகுது!" - திம்மக்காவின் வார்த்தைகளை,

சுற்றி நின்ற ஊர்க்கூட்டம் நன்றியும், நெகிழ்ச்சியுமாக ஆமோதித்தது! திம்மக்கா பாட்டியின் கணவர் 20 ஆண்டுகளுக்கு முன்பு இறந்துவிட, இப்போது முதுமையில், தனிமையில் இருக்கிறார் பாட்டி. ஆனால்... சர்க்கரை, இரத்த அழுத்தம் என எந்த நோயும் இல்லை. கண் பார்வை அத்தனை துல்லியம். தொலைபேசியில் பேசுமளவுக்கு கேட்கும் ஆற்றல். அவருடன் நடந்தால் மூச்சு வாங்குகிறது நமக்கு. அரசாங்கம் வழங்கும் முதியோர் நலத்திட்டத் தொகையான 500 ரூபாய் மட்டுமே ஆதார வருமானம். வாசலில் சாணி தெளிப்பது முதல் சமையல் வரை வீட்டு வேலைகளைப் பார்த்துக் கொள்கிறார் இந்த 101 வயதிலும்.

"ஊர்ல இருந்து டவுன் ரொம்ப தூரம்ங்கறதால, அவசர ஆபத்துக்கு மருத்துவ உதவி இல்ல; பிரசவத்துக்குப் போற பொண்ணுங்க ரொம்ப சிரமப்படுறாங்க. எனக்கு பெங்களூருல, கவர்மென்ட் வீடு கொடுத்துருக்கு. ஆனா, அதை நான் பார்த்தது கூட கிடையாது. அதெல்லாம் எனக்கு தேவையில்ல... எங்க ஊருல ஆஸ்பத்திரி கட்டிக் கொடுத்தா போதும்!" என்று அரசாங்கத்திடம் கோரிக்கை வைக்கும் இந்த "செஞ்சுரி" பாட்டி... ஆச்சரியக்குறிதான்.

நன்றி : அவள் விகடன், 25.10.2011


Sunday, October 27, 2013

தூக்கு போடும் விழா - பெய்ஜிங்


சீனாவில் உள்ள மாயோவ் யோவ் டான் டோங் சிறுபான்மையினர் நாவோயூ, என்னும் திருநாளைக் கொண்டாடுகின்றனர்.

தென் சீனாவில் உள்ள சுய ஆட்சி பிரதேசமான இப்பகுதியில் நடைபெறும் இந்தத் திருநாளின் போது, கம்பத்து மக்கள் ஒன்று கூடி தங்களது விவாசயம் செழிக்கவும், செல்வம் பெருகவும் பிரார்த்தித்து மாட்டை கயிற்றால் கட்டி மரத்தில் தொங்கவிட்டு கொன்று பின்னர் அதன் இறைச்சியை அனைவரும் பங்கிட்டுக் கொள்வர்.






Wednesday, January 11, 2012

இராசயனமற்ற சுரைக்காய். எடை 4 கிலோ. உயரம் 11/2 அடி பினாங்கு பயனீட்டாளர் சங்க பணிமனையில் வளர்ந்தது


பி.ப.சங்க தலைவர் எஸ்.எம்.முகம்மது இத்ரிஸ் கைகளில் இருக்கும் சுரைக்காய் பினாங்கு பயனீட்டாளர் சங்கத்தின் பணிமனையில், தொடங்கப்பட்டுள்ள இயற்கை விவசாய தோட்டத்தில் வளர்ந்து சுரைக்காயாகும்.

இதன் எடை 4 கிலோ. உயரம் 11/2 அடி. மக்கவைக்கப்பட்ட இலைதழை எரு, இயற்கை முறையில் தயாரிக்கப்பட்ட பயிர் ஊக்கிகள் தெளிக்கப்பட்ட, வேலியில் வளர்ந்த சுரைக்காய் இது என பினாங்கு பயனீட்டாளர் சங்க இயற்கை விவசாய திட்டத்தின் ஒருங்கிணைப்பாளர் என்.வி.சுப்பாராவ் கூறினார்.

பெரிய அளவில் பராமரிப்பு தேவைப்படாமல் இயற்கை எருக்களை மட்டுமே போடப்பட்டு வளர்க்கப்பட்ட இந்தச் சுரைக்காய் பார்ப்பவர்களின் மனதை கவரும் வகையில் இருக்கிறது.

காய்காறிகளின் விலை அதிகரித்து விட்டது என புலம்பிக் கொண்டிருக்காமல், வீட்டிலேயே மிளகாய். வெண்டக்காய், கத்தரிக்காய் என பலதரப்பட்ட காய்கறிகளை நட்டு பணத்தை சேமிக்கலாம் என ஆலோசனை கூறினார் என்.வி.சுப்பராவ்

நன்றி : பினாங்கு பயனீட்டாளர் சங்கம்